Ein Erbarer Radtt der Stadtt Kirchhaynn, Gippt Ihnn untter Brieff unnd Siegell zeugnüß, daß Ehr vonn seinem Vatter Mattheuß Grössenn unnd seiner Mutter Catharinenn, Alß vonn Erbarnn, Christlichenn Eheleuttenn, Inn stehennder Ehe, Auff einem rechttenn EheBette, gutter deuzscher untadellhafftiger Artth, gezeygett unnd gebohrenn ist. unnd daß sich Beydaß die Eltern, unnd der Sohnn, Inn einem guttenn Gerüchte, Ehrlich, Froemblich, unnd auffrichtigk vorhaltten, die Zeugen seiner Ehrlichenn geburtt sündt geweßen, Lamprechtt Terne, Lorentz Krüger, Hanß Meistner und Hanß Otto.
den 21. Decemb: Anno 1590.

Ein Radtt zu Finsterwalde, gippt zur Kundttschafft, daz Ehr vonn Mattheß Zochenn seynem Natürlichenn Vatter, unnd Christina seiner leiblichen Mutter, auff einem Rechtenn Ehebette, Echtt unnd Ehrlich, guter deuzscher Artt her kommenn unnd geborrenn sey, unnd daß sich Beydeß der Sohnn unnd die Elternn Redlichenn unnd Erbarlichenn Vorhalttenn, die Zeugenn seiner Ehelichen geburtt seindt gewesen, Jacob Mielagk, Clemens Richtter, unnd Bartholomeus Koßwigk
geben den 3 Julij Anno 1587.
Unnd ist zum Bürger angenhommenn worden.